ஸ்ரீ ராமஜெயம்

பழம்பெருமையும் பண்டைய காலச்சுவடுகளின் தொடர்ச்சியுமான மகத்துவத்தைத் தன்னகத்தே தாங்கி நிற்கும் புனித நகரமாம் அயோத்தி. உத்திரப்பிரதேசத்தில் சரயு நதிக்கரையில் அமைந்துள்ள இந்நகரம் பகவான் ஸ்ரீ மஹா விஷ்ணு, ராமபிரானாக மனித ரூபத்தில் அவதரித்து, மனித குலத்தின் உயர்வையும், தர்மத்தின் மகத்துவத்தையும் உலகறியச்செய்த தலமாக விளங்குகிறது.

பகவான் விஷ்ணுவின் ஒன்பது அவதாரங்களில் ஏழாவது அவதாரமாகிய ஸ்ரீராமன், மனித வாழ்க்கை எவ்வாறு உயர்ந்ததாக அமையவேண்டும் என்பதைத் தன் வாழ்வால் எடுத்துக்காட்டினார். மனிதன் எவ்வாறு சிந்திக்க வேண்டும், பேச வேண்டும், நடக்க வேண்டும் என்பதையும், ஒரு சிறந்த ஆட்சி எப்படி படைக்கப்பட வேண்டும் என்பதையும் உணர்த்தியதே ராமராஜ்யம் ஆகும். அது வெறும் ஆட்சி முறையல்ல; தர்மத்தை நிலை நிறுத்தும், அமைதி நிலைக்கும், இறையருள் பொங்கும் வாழ்வியல் முறையாகும்.

இறைவனோடு ஒன்றிணைந்து வாழ்வதிலே உள்ள ஆனந்தம் அளப்பரியது. ராமராஜய்மாக விளங்கிய அயோத்தியில் வாழ்ந்த மக்கள் இறைநிழலில் ஞானம் பெற்று, அதன் மூலம் முக்தியை அடைந்தனர். இதனால்தான், இந்துக்களின் முக்தி ஸ்தலங்களில் முக்கியமான தலமாக அயோத்தி விளங்குகிறது.

இந்தப் புனித நகரத்துக்கும், தமிழகத்துக்கும் இடையே ஆழமான ஆன்மீகப்பிணைப்பு உண்டு. இன்றளவும் தமிழ் மக்களின் வாழ்வியலில், பெயர்களில், மரபுகளில் ஸ்ரீராமன் கலந்திருக்கிறார். நாட்டுக்கோட்டை நகரத்தார் சமூகத்தினரால் கி.பி.1885 ஆம் ஆண்டு அயோத்தியில் சத்திரம் அமைக்கப்பட்டு, பகவான் ஸ்ரீராமருக்கான கோயிலும் கட்டப்பட்டது. இன்றளவும் தமிழர்களின் ராமன் என அன்புடனும் அழைக்கப்படும் அந்தத் தலத்தில், தமிழர்களால் தேர்த்திருவிழா நடத்தப்படுவது பெருமைக்குரியது.

காலச்சுழற்சியில் கரைந்து போயிருந்த ராமராஜ்யத்தின் மகத்துவம் இன்று மீண்டும் புத்துயிர் பெற்றுள்ளது. காசி மற்றும் ராமேஸ்வரம் சென்றால் பாவங்கள் நீங்கி புண்ணியம் கிட்டும் என்று நம்புகிறோம். அதுபோல், புனித பூமியான அயோத்தியில் காலடி வைத்தாலே பூர்வஜென்ம வினைகள் நீங்கி, தலைமுறைகளுக்கு புண்ணியம் சேரும்; முக்தி கிடைக்கும் என்பது உறுதி.

உலகில் பிறந்த ஒவ்வொரு இந்துவும் ஒருமுறையாவது ராமஜென்மப்பூமியான அயோத்தியைத் தரிசித்து, இறையருள் பெற வேண்டும். ஸ்ரீராமன் கால் பதித்த அந்தப்புண்ணிய பூமியில் நம் பாதங்களும் பதிய, நாமும் பாவ விமோசனம் அடையலாம்.

முக்தி ஸ்தலமான அயோத்தியில், இறைவனுக்கு அருகில் இளைப்பாறவும். மனமுருக வழிபடவும், உலகத்தமிழர்களுக்கென நாம் உருவாக்கப்போகும் புனித இடமே ‘ராமா ஆஸ்ரம்’. நாமும் நம் தலைமுறைகளும் இறையருளில் இன்புற்று வாழ, அயோத்தியில் ஒரு சிறு தமிழ் ஆன்மீகத்தளமும், தமிழகத்தில் அதற்குச் சமமான தென்னக அயோத்தியையும் உருவாக்க வேண்டும் என்பதே நம் உறுதியான நோக்கம் ஆகும்.

இதற்காக அனைத்து வசதிகளுடனும், பக்தர்கள் தங்கி வழிபடக்கூடிய ஒரு ஆன்மீக மையமாக ஆசிரமம் அமைக்கப்படுகிறது. அந்தத் தெய்வீகத்திட்டத்தின் வடிவமே ‘ராமா ஆஸ்ரம்’.

இது சரயு நதிக்கரையிலும், தமிழகத்தின் புனிதமான காவிரி நதிக்கரையிலும் அமையவுள்ளது.

இது ஒரு கட்டிடம் அல்ல: இது ஒரு ஆன்மீகப்பாலம்

இது ஒரு திட்டம் அல்ல: இது ஒரு தலைமுறைக்கனவு.

இது ஒரு ஆசிரமம் அல்ல: இது இறைவனுடன் இணையும் வாழ்வின் வாயில்.

ஸ்ரீராமன் அருள் எப்போதும் நம்முடன் இருப்பதாக.